عشكتك من زغر

عشكتك من زغر يا فتشة العين
وأخاف أكفر اذا اعبدك عباده
أنا شلتك كلب مابين الضلوع
وصرت تمشي وي نبضي من الولاده
ضكت بيك المرار وماهجرتك
مو هينه المحب يهجر بلاده
ماعوف الفرات البيه تربيت
ولا أكدر أعيش بغير زاده
احبك ياوطن وبروحي افديك
وأموت وتظل رايه أنت وشهاده
مرض بيه أحبك مو طمع بيك
ولا طامع بكرسي ولا قياده
من حزن لحزن جبناهه وياك
شنهي بدنيتك مامش سعاده ؟
نهارك سابح بدم المجاتيل
وليلك غارك بهمه وسواده
بكل بيت منك نايحه تنوح
وبكل شارع الك نار ورماده
بخيت الضال لسه بلا جرح بيك
جماعيه المقابر والأباده
المحتل تسيد على السلطان
والسلطان يددعي بالسياده
أبعد مية متر نوكف طوابير
اذا مرت همر شايله أوغاده
واذا نحجي خرجنا على القانون
ويرد بصدورنا يسدد عتاده
أجه بحريه سوده وسن قوانين
فك وحدة شعب شتت أولاده
كل عشره بحزب صرنه ومليشيات
وكلمن يحكم بحسب أجتهاده
يواحد ما يلوك تصير أقاليم
ولا تقبل نقيصه ولا زياده
يبيت العايله اللم كل الأخوان
والبيت الحلو بلمة أولاده
عرموط الجبل ما يطي بالهور
ونخل البصره ماينسى الحماده
هذاك أنت الجنت للثوره عنوان
وعلمت الخلك معنى الأراده
من العشرين والتاريخ يشهد
أبو الثورات معروف بجهاده
يبو العنبر تغيير عنبرك ليش
بيك الخلل لو خله بسماده
وأظن شعلان جا شك صدر التراب
لو يدري التتر ذبحوا أحفاده
وباكو نفطك بعز الظهيره
والباكك نذل يتبع أسياده
المتنبي أمس حركوا أشعاره
والمنصور سحكوا على أفاده
كل ظنهم تره ينسونك الضاد
لسانك يعربي وماينسه ضاده
عدوك راد أمس يشعلها فتنه
بسامراء هدم دور العباده
وجارك ذاك جان بسدك يبات
ومن طحت بهضم طلعن أحقاده
شوكت حزنك يفض يابو اليتامى
وشعبنا الصابر يبطل حداده
ويمته أطفالنه تشوف المراجيح
وتجف دموعها وترجع أعياده
ويايوم الغريب يعود للدار
وتقرعيونه بشوفه أو وداده
ويمته أمي الحنينه تفك حزنها
ويايوم الجرح ينزع ضماده
يايوم الجرح ينزع ضماده